Porcelarts - 皇家陶瓷彩繪 (1)

自問對藝術冇乜靈感, 讀書時代嘅勞作堂最令我困擾, 小學嘅勞作 / 畫作, 有70% 作品都係老爸創作........ 中學時代遇到個好好嘅美術阿 sir, 知道本人藝術創作能力有限, 明白到我有努力過, 完成嘅作品都會俾我頗高分數, 所以 70% 作品都係自己搞掂 (有個好老師, 係絕對可以令學生面對自身弱項!!)

雖然創作能力十分有限, 但天生對顏色同質感好敏感, 所以年幼時已經有自我一套審美準則 (其實係天生感覺來的, 真係冇得改) ~ 睇中嘅一定係有咁上下價錢, 同一店舖嘅同類貨品, 隨手睇上眼都係最貴果幾件, 成日都嘲笑自己, 對眼係名媛級別, 但父親卻不是李超人 XD 諗起都幾可悲, 唔靚果件睇唔上眼 (雖然靚嘢人人愛, 但我呢類人係對靚嘢好有執著)

自從高中年代開始喜歡high tea (正確嚟講係 Afternoon tea), 當然同時間就會對餐具有執着~ 我無聊到如果個 tea set 用名牌餐具, 加分之餘仲會覺得超值咗 XD 不竟享受一頓 afternoon tea, 唔只食物質素要好, 仲要相應環境、餐具配合!! 以下介紹最近日本好流行嘅 Porcelart~

陶瓷彩繪porcelarts是porcelain和art making的合稱, 日本寶庫社把陶瓷彩繪的做法簡化，重點推廣其中最易處理的貼紙法，即是把既有圖案印上透明貼紙，沾水黏到瓷器表面待乾後再高溫燒製~ 聽落幾容易, 我咁 like 骨瓷呢啲得個樣嘅餐具, 當然要去試下~

伴娘 Esther 好好人, 一問就有興趣, 於是去報名! 由於 workshop 係 Miss 屋企, 地方有限, 一堂最多只可六個人上, 自從出咗報紙訪問, 好多班都爆滿 (我都係因為專訪先知有呢樣嘢), 之後又突然去大阪, 最後母親節5月14 日)果日上堂...........

原本想參加 Trial Class - 1. Soap Bottle / 2. Mug cup / 3. 介子碟, 正常 HKD 400 一堂梗係整杯好, 實用嘛, 介子碟咁細隻, 唔值呢個價! Soap bottle 又係放響廁所唔知做乜, 唔同成日入厠所欣賞咩..............

點知去到冇哂 Mug (其實我每次 email 聯絡都強調我係去整杯), 果下真係想走, 我係為隻杯而嚟, 同我講冇, 真係有啲嬲, 之後佢就話上 free style - 即係俾咗上堂錢, 再另外 material 材料, 於是即時轉班, 一心諗住 trial class 包哂所有嘢, 一下子自己揀, 好辛苦先兩隻合適嘅杯同碟....... 真係有被騙感覺!!

然後要揀圖案貼紙, 最後揀咗碎花, 易整~

呢張日本製水貼, 盛惠 HKD 180

好大張, 三個人 share 三套杯碟都冇問題~

跟住開始整, 只要明白圍住外邊剪就OK, 透明部分經高溫燒製就會冇

Miss 又無講明, 問多句又唔耐煩............

 

準備開工~

匆忙下嘅完成品

上: 我嘅作品 (其實唔係好對稱, 多啲時間就好啲) 不過肉眼唔覺嘅~

下: 朋友仔作品 (pattern 款簡單啲) 清新感覺~

將近完成, 有茶點奉送~

(當然啦, 成$300 / 2 hours)

大約一星期後就燒好, 不過可能近排大多人報名, 仲要去澳門開班, 所以遲遲未有回覆~
過咗三星期後, 終於有得收貨........~

資料補充:

Free Style Class -

HKD300 Lesson Fee + Porcelain + Flower Papers + Firing Fee  $20 each item + parts (e.g. Intitial)

each additional hour HKD$100.

all tools rental are included. (全程只需一盤水同一把剪刀 XD)