The Globe

 The Globe 位於中環 soho 區, 大概擺花街與荷李活道交界, 位處有少少隱蔽 (對於以前住附近嘅我當然冇問題啦) 其實之前manager 帶過我去食一次, 今次大老細們不在, 可以早去遲返公司, 所以又再去食~

 

上次嘅印象係價錢合理, 份量夠多, 可能偏離少少寫字樓區~ (當然以中環嚟講)

今次去明顯多咗人, 可能有口碑傳咗出去~ 內裏格局十分英式酒吧, 樓底夠高, 地方夠大, 好開揚, 正中間位置 BAR枱, 下午時段, 外國人已經坐低食小食, 飲啤酒 (真係嘆 @_@) , 感覺良好~

 

點了其中一款 set lunch, 因為和牛關係, 要加多$20 ($155) ,其他set lunch 只需 $135!

 

同事揀了 - soup of day - carrot 湯 (佢話好好飲), 我就揀咗 salad ~

 

上枱時已經好吸引, 顏色奪目, 很吸睛!

白色嘅芝士好 fresh (唔記得係咩款, senior 話sammi 減肥餐單都有)

橙色係南瓜薄片, 未煮熟關係, 有啲硬, 好彩砌得薄!

呢個沙律好有驚喜~

 

 

Main Course -

中間三片係和牛, 老實講, 似普通牛柳, 都好香肉味, 唔好以和牛角度睇佢會好啲!

出奇地個汁超好味! 好香, 好濃, 食到尾發現, 有蘑菇碎, 應該係cream + 蘑菇

下方係炸雞件, 上方係蝦尾, 和牛下係薯蓉

 

 

蝦肉好爽, 冇腥味, 雞件都嫰滑, 但冇咩偏好

下面豆豆好好味, 成件事好夾~

 

搞笑嘅係, manager 話薯蓉咁滑係落咗好多牛油, 雖然一盤冷水, 但真係好好味~ 今次冇叫甜品 (+$30), 已經好飽了~ 雖然叫 set lunch, 但以上價錢唔包飲品~ (當然可以叫佢攞水), The Globe 呢個價真係超值, 好有水準, 連manager 個煎鱸魚都好大份同好香, 而senior 個豬扒包非常之巨型............好過我去Grappas 成二百一個set lunch (當然多飲品同甜品item)