大戶屋

原來有兩個星期冇出新 blog, 繼之前玩具篇後, 嚟緊都應該回歸美食 (已經積咗好多相响手機)

 

今次去嘅係康怡吉之島內 "大戶屋", 呢間舖在日本好多分店, 價錢實惠, 味道非常之不錯, 而且裝修有日式風格, 唔會坐得好逼! 所以值得一試的~ 每隔一段時間我同另一半就會幫襯!!~

 

話說吉之島係我最愛去嘅地方之一, 以前住港島區, 爸爸成日帶我去行街街, 行吉之島最多 (中環永安、先施除外), 以前銅鑼灣有大丸, 就個個星期去行 (淨係行咋, 買嘢好少, 最多去美食廣場同超級市場買嘢), 後期冇咗就行吉之島為主~

 

講返今次食咗啲乜, 另一半仍然點佢至愛嘅炸雞扒熱湯烏冬 (可轉冷烏或蕎麥麵), 炸雞嫩滑, 烏冬有嚼勁, 底下係日本米, 而烏冬唔會好稔!

 

炸雞扒熱湯烏冬 ($98)

 

由於前一晚食咗韓國炸雞, 所以唔叫我食開嘅炸豬扒定食, 轉為食魚~

 

銀鱈魚西京燒定食 ($140)

係我食第二間嘅西京燒魚好味! 銀鱈魚冇雪味, 好滑, 夾開魚肉有好多魚油溢出

好有香味, 超好味! 好有質素, 中環碗屋 set lunch 要$188

大戶屋真係好抵食 (仲要係 dinner 價)

呢個定食我會encore 的!

 

連皮燒好正, 醬汁甜度剛剛好~

 

大戶屋有個特點係, 大部分定食都可以分開單點, 想食多樣餸嘅你哋有多個選擇, 唔一定要跟埋碗飯~