羅富記粥麵專家

細個時阿爸鍾意帶我周圍食嘢, 去親都係去茶餐廳或者粥麵檔, 到大個時都會耐唔耐去食下生滾粥同雲吞麵~

 

HK 有好多出色嘅粥粉麵舖, 貴嘅有 - 麥奀記、何洪記、正斗、池記, 中價嘅 - 好旺角、羅富記、忠記等, 加埋摺咗嘅CWB 利苑, 都係我成日去幫襯! 另外, 鏞記酒家嘅粥以前我都成日食.......... 仲有其他冇咁出名嘅, 搞到我都變咗粥麵專家 XD

 

今次食呢間係由細食到大, 有成 30 年喇~

 

生滾牛肉粥

老實講, 以傳統粥舖嚟講, 宜家唔太出色, 開頭熱食時好杰身, 但食到尾時好稀,

呢個情況在好旺角唔會發生, 可能為咗節省時間用磨咗嘅米溝出嚟,

如果粥底真材實料慢慢煲, 係唔會咁, 不過以中環呢個價錢同質素,

仍然好有競爭力同算出色喇~

 

 

蜆蚧炸鯪魚球 (細) $18

新鮮炸, 上枱時超熱, 要小心地食!

雖然係 $6 粒, 但大大粒 + 平時難食到, 抵俾啦~

魚肉夠彈牙, 最重要我勁怕細骨都冇問題!

碟蜆蚧真係幾鹹, 點少少落鯪魚球, 好夾, 剛剛好的~

 

仲有食埋雲吞麵, 不過趕住走嘅關係, 冇影到相, 快快食完埋單走人, 鹼水味比較重, 同落比較多油, 不過都係細個時味道, 變嘅係食客啫 (本人老喇 @_@) 

 

宜家傳統家庭式嘅粥麵檔買少見少, 生滾粥嘅靈魂粥底要好用心機慢慢煲, 在這速食年代, 又可以保留幾多年? 再者, 租金上升得令人咋舌, 一間又一間老字號漸漸消失於都市中, 這些老味道還可以持續多少年, 想起都覺唏噓 ..........