乘着女子組成立兩週年紀念 7/3 (時間過得真係快!), 約出嚟食餐勁嘅慶祝一下! 友人喜歡食韓國菜, 於是去她推薦嘅李家食炸雞~ 乘着最近韓劇 "來自星星的你" 嘅熱潮 , 女主角千頌伊 (全智賢飾) 最愛嘅炸雞 + 啤酒, 都估到一定多人, 去食開嘅靚女話以前有得 book 位, 而且係任坐唔會被趕走, 點知前一晚打電話 booking 時話要排隊了, 再加埋前一晚TBB 介紹金巴利道呢條新興嘅韓國街.............. 本着想試嘅決心, 各位組員都準時放工去排隊!
去到嘅情況比想像中惡劣, 已經排咗十幾人 (舖面好細, 只可以容納好少人), 因為有組員 OT, 所以都唔介意企下 (但係排果日忽然勁大風, 吹到頭都亂, 呢個 "星星餐" 真係得來不易 @_@
各位唔想排大隊仲有一個方法, 就係去相隔一至兩個舖位嘅酒吧, 那間酒吧嘅炸雞就係李家提供, 當然係要幫襯酒吧嘅 drinks 啦, 但係唔駛排隊就有炸雞食, 好吸引嘅條件!! 當然如果係食其他韓式食品, 仍然係需要排隊嘅........
我哋等咗 1hr 就有位, 已經算係好好彩, 因為前面等嘅都係 2-4位, 而我哋一行六人可以坐店舖角位, 好似廂房仔嘅地方, 我哋就係咁跨過前面 十幾人入去進餐~
前菜有免費嘅蝦條 (無錯係卡樂B 果啲蝦條) 同酸蘿蔔, 非常之開胃醒神!! 之後當然到以下嘅正餐啦.........由於店內好昏暗, 所以影嘅相真係唔多掂.........
炸雞雙拼 (甜辣 + 原味)
好彩即上網睇食評, 發現可以有雙拼 (menu 無寫, 不過附帶條件一定要有原味)
熱辣辣脆口嘅炸雞真係好味, 原味有啲似巴辣香雞翼 XD
另外, 一定要食原味先, 甜辣味會好搶, 食先嘅話就對之後原味冇乜感覺
鐵板燒豬腩肉 $150
腩肉肥美, 燒香當然好味, 有少許辣, 但可以接受~
泡菜薄餅
泡菜味唔太強烈, 冇辣味, 連我呢個唔食辣嘅人都覺得冇辣
食落感覺好似酒樓嘅煎薄撐, 脆口啱我口味~
芝士炒辣雞年糕
感覺似PIZZA, 年糕好入味, 芝士好香 (熱食時拉開芝士係唔會斷)
雞肉都係雪藏貨, 不過芝士同少少泡菜汁墊底, 感覺唔會太差
另外, 李家有另一名菜 "芝士蛋卷", 因為其中一位組員唔食芝士 (樓上嘅年糕都係夾硬叫, 因為唔叫真係無咩啱食, 唯有攞最底無芝士果啲年糕), 所以無緣一試, 聽聞真係大碟同好正~ 同場仲有叫 cooktail , 味道普通, 友人話都係配啤酒最夾, 個個都中哂 "星星毒" XD
店員差不多全係韓國人 (似係家庭式運作), 簡單英文都會明白, 主要都係拎住 menu 看圖識字, 指手劃腳~
個人唔多喜愛韓國菜, 而且不嗜辣, 李家嘅出品連我都覺得不錯, 而且辣度也可接受 (落 order 時店員會提醒會辣, 避開那些特定就可以了), 不過要排大隊再食就未必, 宜家好歹都叫做趕下 "星星" 熱潮丫~ 仲有李家每樣菜式好大碟, 記住一定要搵三五知己先好去食, 唔係叫兩款菜式已經飽到傻!!
沒有留言:
張貼留言