Mogri 飯堂 - 肉醬意粉 (復仇篇)

休息咗一星期嘅 Mogri 食堂再次始動, 繼上次失敗咗嘅肉醬意粉, 今次捲土重來! 同時間幫新入手嘅 LC Satin Pink 17cm Oval Dish (Stoneware) 開光~ 講得復仇篇, 當然算係成功啦! 

 

 製成品賣相不俗呀~

 

材料好簡單, 只係蕃茄、洋葱同豬肉碎 (冇出鏡)

 

今次新追加 Made in Italy 嘅蕃茄醬~ (購自CitySuper $37.5)

呢款係用有機蕃茄製成, 而且比起其他同類產品 Sodium (鹽) 含量較低

(比普通嘅醬貴 1/3 價錢, 其實都係十幾蚊, 都值嘅)

真係要習慣睇標籤說明, 可以幫自己揀更健康嘅食材

 

鮮茄同洋葱只需放鹽同糖再加少許香草調味

(因為現成蕃茄醬一定調咗味, 所以自己果part 鮮茄不宜落太多)

呢度用咗 1/3 樽茄醬

 

由於肉醬意粉冇湯嘅關係, 可以放到好高

簡直係"歡樂滿東華式" 擠入焗盤~

可放入嘅份量連媽咪都驚訝

(原先媽咪係想自己果碗即食唔放上芝士焗)

 

 用 LC 煮食真係令到食材超級熱 (仲要為咗開樽蕃茄醬煮得耐咗)

放上芝士已經溶緊 XD

  

光波爐預熱 180度 1 min, 然後放入焗盤於低架 180 度 4 mins

最後 200 度 2 mins (以上時間同温度都係靠估咋 XD )

放上高架好易令芝士燶, 低架穩陣好多

最後兩分鐘加大火力, 令到芝士更金黃香脆

當然呢個時候要企在爐前目測, 預防過火位變燶~

為咗吸引嘅賣相, 唔可以偷懶呀! 

 

17cm Oval Dish 入到細 size 光波爐!

由於呢個 size 都係撞嚟買

(見代購在日本 outlet 買嘅價錢好合理, 仲有至愛粉紅色先買咋)

估唔到剛好放到入去, 已經毒到朋友想入手 XD

 

完成作品!

(襯哂我嘅粉紅 silicon 墊 XD)

 

用咗焗盤效果好好多, 將意粉集中焗, 芝士下面嘅意粉同材料可以保持濕潤, 用大碟攤開哂反而唔好, 難鋪滿芝士碎之餘 (要用勁多芝士先得), 仲要肉碎同意粉好易焗乾!

 

當然全天然蕃茄製醬汁較健康, 但發覺用好多蕃茄都幫唔到意粉上色 (新鮮食材完全淹沒於意粉中 XD), 而且我見嘅人氣 blogger 全部都用現成茄膏或者蕃茄醬製作, 為咗成功, 於是屈服用咗現成品, 當然效果好好, 阿哥都話同出面食肆嘅味道好似~ (當然佢果part 我加重少少味, 灑咗 Parmesan cheese 粉同多啲香草)

 

媽咪唔 like 用現成醬, 但都話今次要做戲做全套, 誓要做出似樣嘅作品! 火_火 (大家都有團火 XD)

 

講起蕃茄醬, 發生小插曲, 話說上個月買咗之後就放入雪櫃, 可能冷縮熱漲關係, 媽咪超大力都開唔到, 之後放近火爐, 後期仲直接將蓋放上明火整熱 (當然唔係直接燒個蓋, 係明火上面 "慶" 住佢), 最後媽咪在最後一刻成功開到, 之前以為唔得用鮮茄算, 但一放上意粉已經沉沒哂, 一倒上蕃茄醬, 即刻上哂色, 成為各位心目中嘅肉醬意粉!

 

正因如此, 要等凍嘅蕃茄醬變熱, 就將意粉滾耐咗, 變成較軟身 (呢個係 daddy 評價), 下次冇咁甩轆, 一定仲好食!

 

另外, 煮西式食品真係要有一樽香草傍身,  有畫龍點晴嘅效果, 不僅味道更豐富, 賣相仲更吸引!

 

今次好搞笑地冇試過味就俾 daddy 食, 基本上佢同阿哥係第一次試我手勢, 好彩之前煮過下, 大約知調味份量, 而且現成醬味道一定唔會差太遠嘅! 經過兩個月特訓, 下廚係有信心咗, 要繼續努力, 反正仲有 2/3 樽蕃茄醬剩, 下次可以挑戰更容易、Garfield 最愛嘅肉醬千層濶麵~