Mogri 飯堂 ~ Grill 雞扒 ~

經過上兩星期嘅煮食特訓, 開始對烹飪有股熱誠與信心 (唔向難度挑戰就唔大問題~) 今個星期就決定食啲香口嘅嘢, 拎返隻 Grill Pan 出嚟!! 之前好多網友對 Grill Pan 投哂降, 之後網上幾位 LC 達人教路, 已經令到唔少 JM 拎返個 Pan 出嚟重見天日~ 既然我買咗當然要試下, 點都要克服佢!!

 

因為網上好多評價係煎扒勁黏 (痴) 底, 所以今次只買了普通雪藏雞扒作試驗 (實在唔捨得去一田/ Citysuper 買塊靚扒一出場報銷呀 ~_~), 燶咗就掉咗佢啦! (當然有叫媽咪買定其他食材作後備用, 唔想因為我個人失誤, 無飯開呀 XD)

 

Grill Pan 剛送到家時, 已經開咗光, 因為未掌握到技巧, 始終覺得食物唔太香口 (可能怕燶, 一開始唔敢太大火), 今次拎起手, 上次養鍋嘅油已經有少少起霉, 我放低太耐喇, HK 天氣又潮濕又熱........... 見到呢個情況就即刻用熱水沖洗一下, 當然啲油漬好快起咗出嚟!

 

雞扒響MK 買, 行咗陣街, 拎到返屋企已經解凍哂, 直接放醃料就得~ 今次輕手咗, 只落少許鹽、糖、豉油同黑椒, 下次可以落多少少, 味會再濃啲!

 

快手拎起手譜, 溫故知新, 記好步驟, 決定豁出去! 首先倒凍水放 pan 上, 滾起後倒走, 然後用廚房紙巾抺乾, 作用係令 grill pan 更快熱同受熱均勻~ 之後塗上油, 等到起白煙就放食材 (雞扒)

 

Grill pan 上半部分係鋁紙倒影, 證明係有水響上面 XD

 

今次落多咗油, 不過頭幾次整係要放多啲等個 pan 吸收下~

放上去已經 "sasa" 聲, 感覺好澎湃 XD

 

- 題外話 -

 

因為用咗抽油煙機, 原來出咗好多白煙都唔知, 總覺得少少煙唔多夠, 點知實情係 pan 熱得滯,

令到煤氣爐啟動安全程序自己熄火, 之後重開幾次都被強制熄火.............

唯一辦法係降低pan 嘅溫度先可以再開火, 唯有在無火情況下落雞扒, 雞扒放在Pan 上即刻吸收熱力, 再開火已經無問題, 之後全程用極細火~

 

 

 

燒咗 2mins 用筷子夾一下, 見到唔黏底, 即反轉另一邊, 已經清楚見到斜紋~

 

因為太厚關係, 燒咗好多耐先至收水, 雞扒一路出油~ 

  

底部其實可以再燒多一陣, 下次劏開一半會快熟啲同會煎香啲~

(最後唔記得落香草...........) 

 

估唔到正式第一次用 Grill pan 咁成功, 冇黏底, 真係要向網上高手們多多學習, 最重要一定要狠狠地燒到個 pan 十分熱~ 黑底唔駛怕太高溫, 唔夠熱反而會黏底, 最後洗到傻XD