情人節 + 元宵節午餐 @ 太平館餐廳

友人約食lunch，揀咗上星期book 唔到嘅太平館餐館！ 被譽為瑞士汁始創者，經歷多年仍然生意不俗！

今次食嘅係中環店，返過中環工都知，食lunch難揾位，價錢貴，冇質素 (最慘人工唔見得比其他區分多咗 - 相同工種下)

雖然太平館set lunch要$90，價錢已經算合理，起碼有booking service 先！

 

雖然食唔到主打, 但可以叫瑞士汁炒河補返.......... 

 

友人唔想食牛肉, 所以改咗肉片 (豬肉), 瑞士汁一貫地濃, 因為帶甜, 所以唔會覺得鹹, 但有少少油膩, 始終個汁都幾 rigid ~

 

Set Lunch 跟嘅餐湯, 今次揀咗羅宋湯, 不過全部都係紅蘿蔔, 不如叫紅蘿蔔湯仲貼切~

(好彩我都like 食紅蘿蔔, 份量咁多, 感覺較健康!)

 

焗豬扒飯

望落其實覺得係肉醬, 但可笑係一塊蕃茄都冇, 全部紅蘿蔔, 覺得自己做咗陸行鳥 XD

豬扒好大件, 而且都幾鬆滑, 感覺不俗!

 

餐牌上同雞有關嘅都冇得 order , 理由係佢哋係用新鮮雞隻, 呢樣恕我不能認同, 佢哋整瑞士汁雞翼係用大隻全翼的, 點睇都似係冰鮮, 再者, 一碟有四隻, 即係用咗兩隻雞, 邊度搵咁多雞, 淨抽兩隻雞翼出嚟用................. 同埋新鮮雞隻價錢, 貴得驚人, 細細隻已經 > $100, 佢呢句話真係好有嫌疑!!

 

以呢個價錢可以 book 枱 (當然枱與枱係幾迫, 但係中環食肆間間都係咁), 仲要中環核心區域, 太平館真係一個好選擇, 等活雞供應後再去食個瑞士汁雞翼 (雖然我真係唔信佢用活雞嘅翼 XD)

 

如果各位三五知己去食, 記得要食佢個好出名嘅梳乎里, 真係好大個, 焗到好高身, 當然係勁飽肚, 幾年前同舊公司同事去食, 一人一個 set lunch 後食, 六個人都搞唔掂佢, 要食就要減正餐份量的!!

 

當日情人節去睇到 waiter 叔叔話, 晚餐冇梳乎里供應, 可能太浪費時間, 要食好耐同埋工序煩複!!