Sharp Slower Juicer

又係毒 group 出事! 見到谷友推介慢磨機, 雖然知道自己平日少飲果汁, 但最後都中咗毒! @_@ 知道可以自家製豆漿後即時心心眼, 及後知道仲可以整杏汁 / 芝蔴糊同椰子汁, 更加覺得冇敗錯 XD

 

大少知道我心心眼, 又有大優惠, 所以第二日一早入 BB 展會場買俾我, 製造 surprise !~ (大少終於記得我鍾意啲乜, 雖然氣炸煱只係記咗一半, 我日哦夜哦策略大成功! XD)

 

近年流行慢磨機, 初研發者係韓國, 一部橫機, 勁大部, 功能多多, 除咗可以整果汁, 仲可以整麵條, 一機多用, 不過最少四千大元起! 及後 Sharp 出咗慢磨機, 雖然功能只係用於果汁身上, 但好處係直身機, 向高空發展, 佔嘅空間好有限, 而且價錢平一半有多 (當然搵到優惠價先係), 谷友發現於剛過去嘅 BB 展有大優惠, 於是通知大少, 而大少好識做地於星期日一早入場購入~

 

慢磨機同普通榨汁機唔同係用研磨法壓果汁出嚟, 普通嘅係靠高速打發 (爛) 果肉的! 最大分別係慢磨機用少差不多一倍生果, 例如一杯橙汁平時要用4個鮮橙, 慢磨機只需要2個就可以, 再者, 高速攪拌機在打爛果肉過程打入好多空氣, 令到一些易氧化嘅生果如蘋果會變色, 而且果肉同果汁分離, 變成分層, 至於其他都要我試下發掘佢更多好處...........好心急 tim XD

 

雖然話韓國牌好用, 但係我呢個日牌控, 實在抵唔住 Sharp 嘅魅力, 白色機身同日系 feel, 感覺良好! (始終我都係日本 fans XD)

 

部機宜家唔响我手, 所以試機文要下星期先有~ 我都好期待呢~

 

BB 展Sharp showcase 早場 (2PM 前)價 HK$2,180 (原價$2,988)

過咗兩點後變回 HK$2,388, 點都平過出面嘅

仲包一定係行貨, 不過original invoice 要稍後寄去大少家

 

 

除咗有優惠價外, 仲有額外禮品~

原本想大少十月尾去大阪時於 outlet 敗嘅 LC Stoneware

宜家已經入手, 好嘢~

 

 

最愛嘅粉紅花花! 仲要漸變色~

想要大花盅好耐, 奈何價錢問題

原本只有小花盅 set only, 有埋呢個可以整多啲甜品!

 

 

跟機附送果汁食譜~ (英文版)

有網友收到嘅係中文版, 不過冇所謂, 最緊要係平!

 

估唔到阿哥同我一樣興奮, 已經話要買一堆蔬果榨汁!

 

希望我可以用盡佢, 唔好辜負另一半一番心意! (實情係另一半激嬲咗我, 自動補鑊, 平時唔會咁有 surprise ga ......)