唔知係咪近年日本動畫界無咩大作出品, 或者流行集體回憶, 估唔到聖鬥士星矢仲有機會响大銀幕同大家見面, 當然, 要大家乖乖付款入戲院欣賞 (包括我) 要搞啲新意思先得! 雖然係星矢動畫, 但今次用上全新人物設定, 故事都全新編製, 務求將黃金十二宮嘅故事濃縮到 93mins 完結, 聽都覺得有難度, 基於呢樣好奇心 + 星矢忠實 fans (算係啦 XD), 點都要入場支持下!
由於香港太少戲院上映, 仲要每間戲院每日上得一場, 真係好難夾到時間去睇, 日期一改再改, 終於星期五放工去睇喇~ 好彩前排買飛時見到旺角新世紀廣場有得睇, 唔係要去德福果邊真係唔多方便!!
不過可惜太遲買飛, 攞唔到首星期送嘅 folder , 話雖人設唔同, 但唔駛錢點都想要 XD (好師奶呀!!)
海報設計唔錯~
真係迷你戲院, 好少座位, 場內都有 8 成滿
影底票尾留念~
說實在, 要响 93mins 講哂十二宮故事真係好有難度, 節奏超快, 但我覺得唔錯, 起碼唔會拖時間, 而且都有好多經典場面保留 (例如紫龍被巨蟹用腳踩頭一幕), 而且 CG 畫面畫得好有美感, 戰鬥畫面流暢, 但就好有 Final Fantasy feel, 特別係撒加最後成大怪物一幕, 對於 fans 係心痛, 而且真係同 FFX 劇情一樣......... 再加埋星矢、冰河同瞬嘅造型, 完全覺得係 Final Fantasy CG 班底來的........ 如果問我, 當然原著設定好好多啦~ 沙加同撒加原著造型冇得彈, 新版本真係削咗少少, 撒加唔變大怪物都唔錯的, 但都係原著正好多!~
睇戲前見到以下海報, 係頭文字D 電影, 緊接住星矢上映, 不過又係開頭嘅故事, 話係重新畫過, 但啓介又唔覺靚仔咗喎 @__@ 不過都會入去捧下場, 對於一年入唔到一次戲院嘅人, 一個月內去兩次已經好勁, 係日本動畫先可以咋~ (仲要係我嘅至愛嘅動畫先得XD)
沒有留言:
張貼留言