Greyhound @ IFC

 去過曼谷自由行嘅朋友都知道, Greyhound 係一間好有名氣嘅西餐廳 (同泰菜 fushion), 宜家每次去曼谷都會幫襯至少兩次, 佢嘅意粉整得好味道, 再加上價錢比 HK 便宜得多, 所以係人氣食店, 今日大少生日, 由於驚加班唔敢 book 枱食飯, 所以都係去 Greyhound 乖乖排隊~

 

去到部長問一個鐘交唔交到枱, 心想, 睇 menu 都要5 mins, 有冇咁趕呀............ 大少未到, 當然拒絕, 再等下有張一個半鐘交枱嘅, 入到去大少剛到~ 店餐後 5 mins 就開始上菜........

 

蟹肉炸春卷

5mins 可以上到菜嘅, 好明顯係翻炸, 但今次仲似用微波爐翻熱的

內裏真係食唔出有蟹肉, 好失望

反而覺得用附上嘅菜包住春卷食幾清新

 

香草蜆肉意粉

可能我味覺今晚失靈, 完全唔覺得香草味

 

海鮮墨魚汁意粉

中規中矩, 呢個價錢都合乎標準

不過頗辣, 各位要留意

 

極速上菜後, 坐低半個鐘就食完, 咁快上菜, 食物質素有幾好, 大家都知, 真係非常趕客! 以上三樣 $378 埋單, 以 IFC 食飯嚟講唔係貴, 但其實價錢唔平, 感覺要快快食完, 快快走, 俾幾百蚊嘅感覺真係好差!

 

畢竟以 HK Greyhound 嚟評價泰國分部就唔啱, 無論食物質素、服務、價錢都唔夠競爭力, 同等價錢, 覺得 Pizza Express 好好多!

 

前年 Greyhound 嚟咗 HK, 以為有多個好選擇, 由於租金同人工關係, 價錢大幅上升, 食物質素同泰國比真係差好多, 再者為咗做多幾轉生意而犠牲食物質素, 嚴重趕客走, 只會自取滅亡, 雖然唔係令人負擔唔起, 但食物質素同價錢唔成正比嘅話, 好快會被取締的!