好友難得自日本返嚟 HK, 而且話唔想再食日本菜, 所以揀咗上海菜呢款大眾喜愛嘅用作聚舊晚飯~
香港有好多出色嘅上海菜店, 以前小南國係我嘅飯堂, 近呢五、六年不斷加價, 已經超出個人可接受嘅水平, 而且喜歡嘅菜式如麻婆石窩飯唔再出, 同埋另一至愛特製蟹粉小籠包質素大不如前 (仲要貴到傻一隻), 所以唔再去了~ 鼎泰豐都唔錯, 但係爆多人排隊, 而且去台北食平啲........ 好彩另一半在前幾年發現咗霞飛呢間店舖, 第一店位於 K11, 而我平時都係去呢間多~
小籠包 - 由於唔係蟹粉版, 只可以覺得不俗~
清炒蝦仁 - $108
感覺太清, 唔送飯都ok, 不過同價錢嘅黃金蝦仁吸引好多 XD
蘿蔔煎餅
其實我想食蘿蔔酥餅, 但原來朋友對蘿蔔餅嘅理解同我有差別
不過都好, 可以試新嘢~
雪菜肉絲炒年糕
由於醬汁唔豐富關係, 年糕味道略寡, 有啲單調
松鼠魚 $178
不知何時由崧子魚變咗松鼠魚
朋友學過製法, 但都話自己屋企唔會做, 太煩複喇
魚身夠滑, 炸得夠脆, 酸甜度適中, 可以再酸少少, 伴碟好多椰果
呢個價錢基本十年來唔變, 咁多工序, 抵食!
鱔糊炒拉麵
原先上咗鱔糊湯麵, 感覺好唔同 ga , 即刻退貨!
雖然炒拉麵較油, 但我鍾意食呀~
甜品 - 豆沙窩餅
呢個有啲失望, 餡料唔夠厚, 外皮唔太酥脆, 只可以頂下癮......
題外話: 食肆除咗裝修環境同食物質素外, 服務態度都好重要的, 當晚我去攞位時就遇上態度不佳嘅店員, 好似踩到佢條尾, 得罪咗佢咁, 塊面燶過屋企隻鐵鍋..........
我唔要求普通食肆有酒店級服務水準, 亦都唔會要求員工時刻四萬咁笑哂口 (知道一分錢一分貨), 其實正常態度就可以, 唔會要求太多, 個人認為帶位嘅職員係俾客人店舖嘅第一個印象, 如果唔係, 就算食物再好吃都會大打折扣的!
沒有留言:
張貼留言