老三油渣麵王 @ 土瓜灣

上星期初睇過蘋果日報飲食專欄介紹過油渣麵, 油渣係以前送飯必備, 在物資短缺嘅 50 /60 年代, 人均月薪不高, 冇多餘錢去買餸, 只有用豬嘅肥膏 (大概係, 有錯請更正) 炸香然後送飯, 這好味嘅東西當然換嚟一堆高膽醇嘅數字............. 各位如果係油渣 fans, 睇完以下介紹應該會好開心~

 

睇完專欄過幾日後嘅星期六, 大少開車到土瓜灣食 lunch , 果度有好多食肆小店, 行行下大少話見到前幾日我 send 俾佢嘅油渣麵店, 確認後二話不說走入去幫襯~

 

店子好細 & 窄, 但為咗美食, 各位都唔會介意!!

 

 招牌豬油渣麵 $26 (可另加 $4 要杯豆漿)

有米線同上海麵揀

油渣即叫即製, 好香好脆~ 湯底唔太濃, 可以突顯豬油渣香味!!

 

豬腸蘿白上海麵

 

另有其他小食, 標榜醉瓊樓出品一樣

(因為店主老三係醉瓊樓第一代掌舵人嘅孫)

 

唯一缺點係等得太耐, 因為即叫即炸嘅關係, 坐底到食完起碼要 45mins, 當然為咗美食係唔介意, 內裏冷氣非常夠, 如果店舖剛坐滿就要等, 有位落 order 後又要等, 所以熟客們都係等位時落定單, 咁就快啲有得食~

 

與另一油渣麵名店大角咀英記比較, 老三湯底清淡, 油渣鬆脆, 反而英記湯底頗鹹而且油渣似用萬年油炸, 深沉色之餘亦不大鬆脆 (可能唔係即炸有關), 等候時間英記係一分鐘內送到上枱, 從生意角度, 英記係會大賺而老三頂多收支平衡賺多少少..........