女子組隊員中, 有幾位美女喜歡即影即有相機, 每逢生日聚會, 總會有一部出現, 之後影一堆相返屋企~ 前些日子, 見到佢哋玩得高興, 自己都想入手一部, 可惜睇完之後, 與其用幾百蚊買部機, 之後仲要無止境買昂貴嘅相紙, 而且相片質素唔太好 (我明白好多人喜歡即影即有相嘅 vintage feel), 發覺自己都係喜歡單反 / 無反機嘅感覺 (可能我鍾意影風景, 用即影即用太浪費, 亦都出唔到我所喜歡藍天白雲嘅感覺), 之後購買意欲就此作罷.................
直至上星期準備返工之前, 發現枱面有部 Fuji mini 8, 於是就問阿哥部機係邊個 (以為阿哥買俾女朋友用 XD), 阿哥聽我咁講, 就知對呢舊東西有興趣, 二話不說就送咗俾我, 細問下, 原來係轉台去 1010 嘅迎新禮品來的~
原本想放上網賣走嘅, 因為呢部機係 "帶物累身家", 買相紙都會買窮, 仲要買電用, 唔買就放低屋企封塵, 經過一輪爭扎, 見到阿哥又想玩下, 再加上原價 $460, 上網都係最盡賣到 $350, 媽咪就話咁嘅價錢, 留嚟自己玩下好過......... 於是就開箱了!!
阿哥在白同黃之間選擇, 揀咗粉黃, 俾我都會揀, 粉色系特別吸引!
另外, 仲有粉紅同粉藍一樣吸引, 當然粉黃係比較中性~
以前 polaroid 個款同顏色都好不濟, 經Fuji 改頭換面, 已經變成潮物~
日本人設計同用色真係好厲害, 我都係因為呢部係粉黃色, 先猶豫自己keep or not~
決定咗自用後, 瞓醒一覺, 記起幾年前買咗個 Rilakkuma 袋子~
放入去剛剛好, 終於用得著, 自此同呢部 mini 8 形影不離 XD
自用第一日除咗搵咗個靚靚 Rilakkuma 袋子俾部機
仲出去旺角信和中心買靚靚相紙~
左: Garfield - $62
右: Rilakkuma - $58
有卡通造型可能要買版權 / 設計圖案 / 印圖案去相紙邊位, 比較昂貴, 買白邊相紙最平 $39 就有十張, 之後除非見到好靚相紙, 都係白邊最化算, 宜家出去快圖美曬相都要 $2 (十張起計), 即影即有呢個價都OK, 不過要响信和中心買先咁平, 去到 log on , 起碼貴三成!
另外, 信和中心有好多舖頭賣相紙, 仲有專門店只賣相機同相紙, 經過一輪格價, 二樓其中一間專門店係最抵, 估唔到反而格仔舖係最貴 (同上款一樣嘅 Rilakkuma 相紙賣成 $68, 專個彎竟然貴 $10), 只係行咗 10 mins 就每盒平 $10, 各位去到花少少時間問下價, 真係差好遠!!
不得不讚 FUJI 嘅 Marketing, 同 1010 合作, 送部機出嚟, 之後買相紙先係主菜, 變相無了期幫襯, 賣相紙先有錢賺, 隨時嘔突俾 FUJI 賺番夠本 !! XD
沒有留言:
張貼留言