聘珍樓 @ 時代廣場

難得平日返工都係由九龍去香港，如冇必要下，都唔想weekend 出動過海，夜廣場兩個晚要過灣仔食晚飯，為咗唔好浪費呢個機會，所以下午已經過海遊玩。

另一半認為難得機會，於是帶我去佢至愛嘅聘珍樓飲茶！

因為塞車關係，中途我上去攞位先，免得錯過booking 等位 (雖然我唔認為接近兩點酒樓會爆場)

愛人特別推介鮑汁魚肚，所以一定會order!

鮑汁魚肚 $80

賣相差少少，起碼攞個瓦煲仔上枱 (個人感覺 XD)

鮮蝦餃 $38

好飽滿嘅蝦餃，蝦好彈牙，唔算漂得好勁，價錢合理，特別係本身聘珍樓走高檔路線，呢個價真係平！

蝦餃近鏡，餃皮晶瑩剔透，厚薄適中，誠意之作！

鮮蝦腸粉 $38

腸粉軟滑度適中，宜家美心酒樓腸粉偏厚同煙韌過度，冇咗傳統味道，反而呢度做得出傳統感覺！

韮菜煎餅

呢款點心宜家好少見，另一半至愛！當然有傳統味道，餡都有幾多蝦，好味！

芋絲春卷 $24

一叫好快上枱，所以唔多熱，有少許失望，芋頭唔算有好澎湃嘅感覺，中規中矩！

金磚脆豆腐 $60

呢樣真係唔合格！外皮一啲都唔脆，炸唔起咁，而且份量少，收呢個價簡直唔合理！唯一可取係豆腐滑同幾香豆味。

連碟 XO醬都要收 $15, 略嫌貴咗啲啦，不過勝在食夠二百可以泊時代廣場兩個鐘，都值回票價！