鏞記

雖然米芝蓮今年連推介都唔俾鏞記, 但我覺得鏞記都係OK 嘅 (當然以前質素好啲), 今日平安夜, 約咗媽咪嚟食燒鵝, 佳節無謂帶飯一個人食咁慘情!

不過今日發生不愉快事件! 鏞記電腦系統出問題, 成個order system down 咗, 食客個個齋坐無嘢食, 冇人埋單, 搞到我同媽咪要等位, 我哋等位籌號係 NO.15, 等咗20mins 終於有位, 其實之前都見侍應偷偷放熟客去啲吉枱度 (佢哋係有枱唔叫飛俾我哋入座), 點知臨叫我哋前一對望落似有錢嘅50多歲嘅夫妻入內攞籌, 然後帶位人叫籌 No. 12, 果對極品夫婦就行去, 帶位知客亦都準備帶佢哋就坐........

媽咪見到我趕食飯 (之後要返工), 就開始同帶位侍應理論, 話睇住對夫婦剛入嚟無耐, 我哋一定先, 接待員話佢哋係no. 12 (但個女人係用手指遮住個號碼的), 媽咪唔服氣, 叫個女人拎開手指俾佢睇個號碼, 拎開後係 no. 16!! 媽咪最唔順氣係個女人全程有意隱瞞 (一啲悔意都冇), 同埋個帶位侍應夾埋, 所以堅持要對籌嘅號碼!

事後當然要讚媽咪啦, 心水清望實咩人入嚟, 雖然熟客有時大哂, 但係呢啲繁忙時間, 打工仔得有限時間, 當然要開聲, 據理力爭, 咁富貴就上去上層, 睇佢哋都係想食平啲先到地下搭枱食! 同埋佢哋都唔似打工仔趕食lunch, 唔好阻住人哋個位啦, 仲要打尖!

講完不快事件，講下啲嘢食……

燒鵝脾飯 $99

當燒鵝瀨粉一碗要四十幾蚊，上述包有鵝脾食，仲要份量多啲！梗係要脾飯!

牛坑腩麵

原本叫河粉，但係嚟咗麵，見果日咁亂，唔想打回頭，費事有排都未食得！之前啲坑腩好得，但今次居然俾啲雪藏牛輾物體，收呢個價，簡直係搶！

鏞記真係越做越差，都係少去啦，或者下次改食雲吞麵！