2015年2月17日 星期二

增城蔗糖年糕

後日就係大年初一踏入羊年了! 農曆新年除了有假放外, 最重要當然係賀年食品啦~
 
在我家裏每年必食賀年食品非年糕莫屬! 取其含意年年高, 步步高升! 估唔到年青人都咁傳統同迷信 XD
 
以前外婆整嘅年糕係我們家農曆新年最期待食品第一位, 我同哥哥都很喜歡那煙韌拉絲感覺, 可惜外孫們聚多, 即使外婆整了很多底, 最後只可以分到少少, 近十年外婆體力大不如前, 再加上老人失憶症, 已經無整! 亦都怪媽咪以前懶惰唔跟婆婆學 >.<
 
媽咪見我同哥哥好想食, 於是試整, 成品味道好相近但口感始終差少少, 唔夠煙韌, 直至上年有網友分享整年糕秘訣, 再試整.........不得了, 那童年味道返哂嚟, 哥哥即刻要求 encore , 如是者, 食咗好幾底先收手 XD
 
今年嘅年糕我有份整, 材料亦都嚴選, 希望能夠製作一底更完美年糕~ 
 
縱然有非凡廚藝, 亦要上乘材料配合, 今年買到各谷友推介嘅 "李祥和" 出品糯米粉與及增城蔗糖~ 李祥和出品唔係每間舖頭都有, 上一年行勻成個鵝頸橋街市舖頭, 都冇一間有, 可能我唔識搵, 今年媽咪提議去美孚小型街市搵, 居然有得賣! 估佢唔到, 早知唔駛搵到傻 @_@ 遠在天邊近在眼前.............
 
至於增城蔗糖, 每年只有冬至到農曆新年期間有售, 蔗味好香, 原本媽咪話唔覺有甚麼特別, 直到煮溶後試味才驚覺蔗味突出~
 
整年糕材料簡單, 只有糯米粉+蔗糖 (片糖亦可), 但亦有竅門, 缺一不可~
 
如喜歡煙韌與拉出長長嘅絲感覺只需要糯米粉, 缺點好難煎, 亦好易黏底, 製作時加入粘米粉可令年糕硬身一點, 但少了煙韌感覺, 市面買到的年糕正是如此, 所以我同屋企人都唔喜歡, 再加上不喜歡椰汁味 (屋企都係椰子怪, 但就是不喜歡椰汁年糕, 只要外婆版本純片糖年糕! 童年影響可真大), 要自己整先滿意.........
 
 
整年糕必備材料
 

取出5片蔗糖煮溶, 放涼後倒入已過篩的糯米粉
媽咪分幾次倒入糯米粉同蔗糖水
今次用發蛋器攪伴, 較容易的, 另外坊間食譜建議用手抓粉至無粉粒為止
個人覺得沒太多分別, 個人喜好而已

攪至沒粉粒而且較濃稠狀

因為攪拌得不太順, 再加蔗糖水攪拌
家中有電動打蛋器的朋友, 可以大派用場, 用少好多力, 還可以大量製作的 XD

最後拌到這質感就可以了, 太稀的話就不成糕的
所以建議逐少加份量
- 稀身的話加多些糯米粉
- 濃稠的話就要加多些蔗糖水

錫紙盤內掃油, 倒進粉漿
建議將粉漿過篩一次會更滑
我呢個懶人嘅話, 沒有過篩, 但口感覺得沒問題的
最後拍拍錫紙盤, 令到粉漿更平滑, 蓋上錫紙就可以去蒸了~
(我家媽媽這麼懶當然沒有啦, 成品係唔平滑, 自己享用沒問題啦, 反正美味就可以了 XD)
 
蒸呢一部分係最關鍵, 基本上蒸 1hr 已經熟透, 但口感離小時候嘅還差好多, 網上教的秘訣係要 3hrs!! 初時覺得浪費柴火, 但不死心試一次後發覺果真與眾不同, 童年回憶返哂嚟!! 如 blogger 所講呢個就係秘訣!! (感謝 "Michelle Wong 瘋狂煮婦" 嘅古法秘技)
 
如要美美的脫模, 蒸熟取出放涼後先可以, 唔可以心急 ga~
 
 
 
原本要求媽咪蒸好影張靚仔相俾我, 點知又唔記得.........
瞬間已被哥哥掃光 1/4 底 @_@
 
因為無蓋錫紙, 所以表面唔平滑
自家食無所謂, 反正煎起都唔同樣 XD
 
自此唔駛等每年外婆的年糕, 仲可以大量進食, 有排減肥喇........ 滴汗中 XD
 

落油煎起的模樣, 外脆內軟~
 
 
用李祥和粉的年糕較硬身, 媽咪話反觀三象牌較軟身, 而綜合意見, 增城蔗糖蔗味突出, 十分之可口的~ 而我就兩款糯米粉牌子出品嘅年糕都愛, 反正自家製一定合心水的, 一日已經食咗一半, 睇嚟都要整多幾底先可以收工 XD

沒有留言:

張貼留言