La Bohéme Bakery by Aeon

自從港鐵堅尼地城站開幕後, 由老公嘅家出發去其他也方便好多, 最重要係返工十分方便, 而且總站一定有位坐 XD

 

第一日通車時已經試搭了, 由老公家嘅出口落到大堂就見到一間新開麵包店 - La Bohéme Bakery, 入去買 Pack 方包帶回娘家, 入到去見到宣傳海報, 知道係 Aeon 旗下, 質素應該有保證! 今次由老公家出發返工, 懶惰嘅我唔想煎蛋同烘包 (請老公原諒我 year-end audit season 成日加班好攰的), 於是便想起呢個麵包店~

 

入到去包包整齊排列好, 賣相吸引, 可惜價錢不太吸引, 依我所見, 基本上除了方包外, 其他口味劃一 $9  (日式菠蘿包都係呢個價), 不太便宜, 比起同區嘅祥香 $3 (定係 $3.5 呢?!) 個菠蘿包差太遠, 不過標榜嚴選日本麵粉, 點都要試下的!

 

買有餡麵包, 我最愛揀吞拿魚或三文魚包~

唔甜又唔太鹹, 而且比較健康~

 

個包有我成隻手掌咁長, 好大個 ga!

夾包時已經感覺到外皮係脆身, 如果熱食一定好正~

咬咗 1.5 啖已經見到吞拿魚餡

仲有一陣洋蔥香味~

咬多啖已經係超多吞拿魚餡

再看真啲, 包都好足料, 密度好高、夠軟熟~

 

雖然賣成 $9 一個, 但絕無欺場, 夠大個, 餡料豐富, 而且唔似美心西餅出品, 咬落去中間好大個洞, 仲要餡料勁少, 偷工減料得好緊要, 仲要兩者價錢差不多, 識揀一定揀 Aeon 呢間麵包店!

 

不過有啲擔心佢好快摺埋, 因為同區太多麵包店仲要平佢咁多, 睇佢都係艱苦經營, 希望佢可以開多幾間分店, 對抗下美心西餅都好丫~