Aeroccino 3 by Nespresso

 

 

 



飲 coffee 嘅習慣始於 F.5, 記得當年 Starbucks 剛落戶香港, 我和戰友 (敗家同學) 一齊成日去幫襯~  對於零用錢唔多嘅我已經係好奢侈, 有時候為咗坐耐啲, 一個下午要飲兩杯先得, 再加埋件 cake, 真係放低好多銀両!!

 

除咗經典 Frappuccino 外, 至愛飲嘅係 Cappuccino 了, 因為我唔係咩咖啡達人, 唔可以飲齋啡, 所以有奶嘅我先會飲, Latte 又太奶了, 無咖啡感覺, Cappuccino 對於我嚟講剛剛好, 各方面都平衡到~ 以下先大概說明一下 Latte 同 Cappuccino 嘅比例先............

 

Latte - 咖啡、牛奶、奶泡的比例為1：2：1

Cappuccino - 咖啡、牛奶、奶泡的比例為1：1：1

 

(本 Blog 末段附上一張各咖啡種類嘅比例圖片說明)

 

唔知幾時開始愛上 cappuccino 上嘅鮮奶製泡抹, 每次都係 "食" 哂泡泡才開始飲咖啡, (唔知有冇人同我一樣呢 XD) 自家製以為一定無可能, 當年天真嘅我以為只有商用咖啡機先可以製作泡沫的........... 原來自家製也可以的, 手動之外, 還有懶人方法 XD

 

那當然不是買部自動 / 半自動咖啡機啦, 我可不是陳豪呀!~ 又唔記得响邊度聽過 Nespresso 有部奶泡機可以製泡, 於是去格下價錢, 點知已經出到第三代, 要成千銀, 真係唔捨得!

 

及後過咗兩年, 奶泡機無加到價, 但依然咁愛奶泡, 可惜McCafe 嘅泡沫鮮奶已經加咗幾次價, 要成廿蚊杯 (以中杯計), Starbucks 仲要成三十蚊杯, 所以今年決定入手一部, 只要飲夠三十杯已經歸本了~ (一個好好嘅藉口 XD)

  

雖然連咖啡機買可以減 $250, 但我係 5PM 後唔可以飲咖啡的人

都係奶泡機先啱我~

 

買咗 creamy 色~ (另有紅色 & 黑色)

身後嘅就係同日入手嘅 Dyson Hot + Cool ~

清洗後開始試玩~

分半鐘已經完成一杯泡沫鮮奶, 好快~

 

 杯內有兩個刻度 -

上方:暖奶最高可放牛奶嘅容量

下方: 打奶泡最高可倒入奶的容量

中心有個小儀器就關鍵所在, 移除外圍圓圈彈弓裝物體就暖奶用

成個組件用 (如上圖) 就打奶泡用~

 

 

建議要整兩杯泡沫鮮奶, 那要首先暖奶, 用水清洗後, 再整奶泡~ Staff 話暖奶後, 杯子可直接倒進室溫水清洗, 仲話由於整個杯都有温度感應, 清洗好才可再開機!

 

奶泡製成品偏硬身, 真係可以倒轉個杯都唔跌泡泡 (始終用蒸氣整嘅奶泡先夠幼滑), 唔可以期望成品同 Starbucks / café 比較, 果啲咖啡機動輒十萬以上呀~ 我公司果部小型機都要成 $15k , 所以呢個價錢我好滿意呀~ (不過其實價錢都要 $950~) 懶人福音呀 (當然用完要清洗的) XD

 

奶泡十分之企身, 不夠幼滑

但對於奶泡控如我, 好滿足了~

 

此機另一賣點係可以打凍奶泡, 呢樣夏天先試, 宜家天寒地凍, 都係飲熱鮮奶先窩心~

 

另外, 杯內材質為易潔物料, 切勿使用鋼絲刷清潔, 以免刮掉塗層, 影響健康! Staff 建議用清水清洗就可以了, 不過開光時, 都會以洗潔精沖洗一次~