劉森記

 好耐冇 update 個 blog 喇! (至少兩星期) 要勤力寫返多啲, 因為好多相留响手機度 >.<

 

今次去食嘅係出名蝦子撈麵嘅深水埗劉森記~ 一向被受食家推薦, 成日上電視, 實力當然有番咁上下! 主打撈麵當然麵質夠爽口彈牙, 仲要冇乜梘水味, 值得一讚, 聚多食評都推崇雲吞, 但個人認為牛根更為出色~ 要知道粉麵檔要淨叫牛根已經有難度, 至少要搭埋牛腩, 劉森記不但有得淨叫牛根 (鏞記咁貴都冇得咁叫), 仲要牛根好有質素, 炆到稔滑之餘仲好有膠質!

 

牛根雲吞蝦子撈麵

撈麵上鋪滿蝦子, 好味~ 雲吞另上

 

有三隻雲吞, 以雙拼嚟講算係不俗!

 

另一名物: 自家製酸蘿蔔

真係好醒胃, 一食就知係自家出品, 唔係買現成貨的!

(雖然另一半話唔多衞生, 但我覺得個個都守規矩, 所以唔理照食 XD)

 

劉森記在深水埗有兩間舖, 一間係總店, 轉個彎就係分店, 今次去嘅係總店, 舖面比較舊, 排隊就兩間都咁多人, 但宜家一碗好嘅撈麵同牛根難求, 而且價格合理, 絕對花時間排得過~

 

以前旺角榮記係我嘅最愛牛根河食肆之一, 基於其質素一直下滑同加價 (自由行之禍), 宜家只會承認雞記同劉森記 (其實上環忠記也很好的!) 為飯堂~