Mogri 甜品工房 ~ 蛋白杏仁茶 ~

 

 

 

自從擁有慢磨機後, Ｍogri 飯堂休息咗成兩星期, 換嚟出場嘅係 Mogri 甜品工房~

 

由細到大, 跟得媽咪多, 好鍾意食 nuts, 夏威夷果仁、合桃、杏仁等都好喜歡食, 除了喜歡食焗杏仁外, 杏仁糊 / 杏仁茶之類嘅甜品都好喜歡, 奈何街外食到嘅 (通常都係用杏仁粉開嘅) 一係味道太甜 / 太假, 又或者得苦味 / 藥水味 (唔明點解落添加劑都可以整到咁難食), 所以一直都想自家製作, 希望整到真正無添加嘅杏仁茶出嚟, 剛好有慢磨機在手, 當然唔放過呢個機會! 開光第二轉就挑戰 ~蛋白杏仁茶~

 

杏仁含有豐富的植物性蛋白質、不飽和脂肪酸、維生素類、礦物質、膳食纖維、植物固醇、多元酚類等。尤其含有豐富的維他命E與單元不飽和脂肪酸，根據各項科學研究報告指出，杏仁能夠有預防各種文明病，是兼具美味與健康的食品。(Copy from Yahoo Knowledge)

 

今次成功後, 陸續出場嘅應該會有芝麻糊、腰果糊.........睇嚟糖水舖嘅甜品選擇越嚟越少 XD

 

 

 好友居然以為下面果碗係白飯, 問我做乜杏仁茶送白飯 =.=

其實係慢磨杏仁後嘅碎, 由於太香同唔浪費關係,

所以留低準備炒香佢或者煮麥皮時加入~

 

 

 半碗杏仁 + 一匙白米浸透一晚

(今次白米只浸了兩個鐘, 其實最好要浸透發大透明)

白米用以增加杏仁糊度~

 

 慢磨前將杏仁外皮退去, 雖然杏仁唔多

但都剝咗好耐, 十指都皺哂皮 >.<

(下次試下唔退外皮, 睇下效果係點, 真係好懶 XD)

 

 將杏仁、白米 & 清水放入慢磨機

 第一次出嘅杏仁渣再加半碗水, 倒入慢磨機

最後嘅成品如上圖, 2/3 大湯碗嘅杏仁 + 半小碗杏仁碎

 

蛋白 / 蛋黃分離器 from CitySuper $26

去烘焙店買一定更平、更多選擇的

雖然徒手可以分隔, 但係我呢啲廚藝初哥, 最後一定搞唔掂

(我呢個係 Made in Japan, 又加分 XD)

 

 只要打蛋時向住分離器嘅中心打入雞蛋

蛋黃會自動坐正中間位置, 而蛋白就沿周圍向下滑

 

分隔出嘅蛋白真係好清澈, 完全做到隔離效果~

真係整甜品必備, 廿幾蚊絕對投資得過 XD

 

 

同場加映 ~ LC 漸變粉紅花花盅 ~ 開光!

(阿哥叫呢個係梅花....... @_@ 仲問有咩用

我答:咪影相靚啲, 同埋可以入焗爐 lor XD)

  

    煮滾杏汁後試味, 覺得較稀身同淡

加入牛奶、糖後味道更香濃

(加半碗牛奶唔會奪去杏仁味, 反而會增加杏仁香味)

加入牛奶後再煮滾, 最後倒入蛋白 (圍住煲邊打圈倒入就可以)

  

 真係有蛋白 ga ~

 

自從開始學煮飯後, 廚藝小宇宙大爆發, 不斷上網搵食譜, 跟住做, 同一款菜式, 睇多幾個人嘅 blog, 綜合所有製法, 揀選自己覺得好嘅步驟 / 製法,  基本上都唔會錯, 千祈唔好搬字過紙, 份量唔需跟到好足, 始終各人口味不同, 望多幾篇自然就會有靈感~

 

記得上星期同好友 S 傾談, 講到煮食, 佢話跟食譜書嘅步驟煮食都係失敗, 原因係有啲作者以為簡單步驟可忽略, 事實上, 現今年青人真係未入過廚, 像幼稚園學生般, 每一個細節都要教, 好友 S 上次試煮嘅慘況係, 蒸帶子豆腐, 書中冇提及要將急凍帶子先出水, 結果就成碟變得水汪汪, 唔食得.............

 

經過呢兩個月嚟嘅煮食體驗所得, 跟網上 blogger 係會好過傳統烹飪書, 當然人氣 blogger 會出書, 我當然會捧場, 始終拎起本書係快過上網慢慢搵嘅~ 而且 blogger 辛苦經營個 blog , 支持下都應該的!

 

今個星期要 Mogri 飯堂要回歸, 唔想放低太耐令廚藝生疏!!