Dretec ~ 白柴犬磁石計時器 ~

睇開某 LC 毒谷嘅JM 都知道, 有個計時器响手就可以準確煮出密碼菜, 又或者因為 LC 專門炆同燉嘅關係, 好易會忘記時間, 更甚係一直開火唔記得就出咗街, 所以有個倒數計時器係必需嘅~

 

其實之前已經入手咗 Tanita 嘅計時器 (實情係想襯哂一set 磅 同温度計), 覺得好好用, 而且Tanita 已經長駐阿哥房, 用作拉背 (紏正寒背) 計時用 (有支架可以放上枱, 顯示器不用平放), 所以有需要買多一個廚房用~

 

毒友們都覺得計時器係必需, 去咗 $12店買, 可惜磁石吸力太差, 成日跌落地下, 好彩之前買咗 Tanita , 真係一分錢一分貨, 背面舊磁石超級大舊, 每次用完都要用力撕佢出嚟, 原來磁石可以有咁大影響, 所以買第二個計時器亦都要大牌子, 代購入咗可愛計時器系列, 初時無留意, 因為要買多個, 望真下原來係日本大牌子 Dretec 出品, 即刻落單 (Citysuper 賣 $99, 經代購買只需 $70 包平郵)

 

  

收到後覺得好可愛~

質量很好, 同 $12 店嘅比較, 真係好好多~

 

雖然好大隻白柴犬 (雪撬?!)

但都可以緊貼在雪櫃門上~ 廚房可愛度大增 XD

 

另外, 仲可以調校普通beep 聲同埋狗吠聲

(狗吠聲有啲聲沙 XD) 

 

一個好嘅計時器只係幾十蚊, 絕對值得投資 (由其見毒友們嘅慘況後), 當然各位如果去日本旅行, 仲可以更低價入手, 為廚房增添可愛氣氛~