2013年12月4日 星期三

焗脆腰果

受媽咪影響, 自細好like 食堅果類食品, 夏威夷果仁, 杏仁, 合桃, 腰果....... 統統都係至愛! 一食停唔到口! 雖然係營養豐富, 但食得多係會致肥的.......... 如果我唔係咁為食, 食唔停口, 我估可以好瘦 XD

近年物價通漲, 食材不斷上升, 為將就成本, 食品質素自然下降, 之前阿姨上過烹飪班, 學整腰果, 仲將竅門授於媽咪, 自家製作當然一流啦~

未買光波爐之前, 媽咪係用鍋炸的, 好易燶, 火力要控制得好, 由於唔用成鑊油, 變成有啲少燶, 有啲唔夠燶..........

用信用卡迎新優惠攞咗部光波爐, 再上網睇下 blog, 就試下整腰果, 點知一用好方便, set 好時間同溫度, 坐定就有鬆脆腰果食, 當然要分兩轉焗, 溫度同時間就執生啦!

另外, 網上教學係齋焗就得, 但我同媽咪認為一定要有油先會香口, 光波爐好處係用少許油就得, 健康好多~

小秘訣: 用油掃可以均勻地同腰果掃油, 而且用量大為減少~ 個人推介用矽膠掃, 唔會吸哂啲油同唔會甩毛~

腰果焗/炸可灑上少許幼監調味, 同埋要放涼先可以入樽收藏~

腰果係媽咪在上環海味街相熟店舖買, 一小樽要 $30, 但係非常之有腰果香~ 食唔停口!
宜家都唔會出街買, $30 一大包, 唔知佢用咩油同咩質素腰果, 始終自己整有保障同好味好多!

沒有留言:

張貼留言